KASTRIOTËT DHE RAGUZA

Raguza ka pasur marrëdhënie aktive me shumë fisnikë dhe principata të trojeve shqiptare, si p.sh. me Principatën e Arbrit, Dukagjinët, Matrangajt, Balshajt, Topiajt, Kastriotët etj. Sipas periudhave të caktuara dhe rëndësisë këto marrëdhënie herë kanë qenë të dendura e herë më të rradha duke përfshirë këtu jo vetëm çështje ekonomike, por edhe politike. Në këtë artikull do të bëhet fjalë për marrëdhëniet e Raguzës me Derën e Kastriotëve. Në qendër do të jenë marrëdhëniet e Skënderbeut me këtë republikë, për faktin se ato ishin më të dendura dhe janë të dokumentuara më mirë. Në këtë artikull do të përpiqemi që të japim një vështrim historik të këtyre marrëdhënieve, duke u bazuar kryesisht në burime dokumentare dhe në literaturë shkencore historike, si dhe duke u përqendruar vetëm në disa ngjarje më të rëndësishme të këtyre marrëdhënieve, sepse një paraqitje e plotë e tyre është e pamundur që të jepet brenda një artikulli.